Ek Din Achanak Part 2
Ek Din Achanak Part 2
Raaste Bhar
Pawan Dhadakte dil ke saath saath aage badh raha tha. Uske dil
ki dhadkane itni tez thi ki bagair stethescope ke bhi saaf sunai de
jayen. Wo baar baar peeche mud ke dekh raha tha ki kahin peeche se
Ravi aa jaye aur uski jaan mein jaan aaye lekin jo hona hota hai
wo to hokar hi rehta hai.
Uska dil baar
baar yeh soch raha ki aaj school hi bunk kar deta hoon aur school
time khatam hone ke baad hi ghar jaunga lekin ye karne ki bhi uski himmat
nahin huyi. Wo is baat par aakar atak gaya
ki kahin
agar wo school nahin gaya aur kisi ne uske mama ko bata diya is baare
mein to wo uska kya haal karenge. Use kaun bachayega unse. Yun to wo bahut
pyaar karte the Pawan se lekin unka gussa bahut khatarnak tha. Gusse mein to
unke haath mein ho cheez aa jaye wo usi se saamne wale ko peetna shuru kar
dete hain.
Dar aur
ghabrahat ke saath aakhir wo school ke main gate tak pahunch hi
gaya. School gate ke paas aakhar wo thithak gaya aur uska dimaag
bahut kuch sochne lag gaya. Ab kya kiya jaye. Pehle to wo bhagwan se
prathna kar raha tha ki Rider se uska aamna saamna na ho. Wo aaj school na
aaye wagairah wagairah lekin ab wo soch raha tha ki kaise usse bacha jaye. Agar
dono aamne saamne aa gaye to kaise wo us museebat se chutkara payega. Kya karega wo agar
Rider ne use kuch kaha to yaa uske saath kuch kara to. Lekin kehte
hain na JAHAN CHAH WAHAN RAAH.
Dar aur
ghabrahat ke saath usne main gate ke andar dekha ki kahin aas paas Rider to nahin hai. Jab use tasalli ho
gayi ke wo nahin hai to Pawan andar ghus gaya. Andar to ghus gaya lekin aage
kaise badhe
aur kya kare use kuch samajh nahin aa raha tha. Tabhi achanak use ek
idea aaya. Usne socha ki wo prayer mein nahin jayega aur seedha class room mein
chala jayega. Prayer ke baad Rider aur bachhon ke saath class mein aayega to
uske peeche peeche class teacher bhi aa jayenge period aatend karne.
Uske baad
wo tabiyat kharab hone ka bahana banayega aur recess mein apne ghar chala
jayega. Usne aap ko sabhashi di is plan ke liye aur seedha apni
class ki aur badh gaya sab teacher aur school staff ki najron se
bachta hua.
Class mein
pahunch kar wo apni seat par jaake baith gaya lekin uska dil ab bhi
joron se dhadhak raha tha. Khair jaise hi prayer khatam huyi aur students ke
aane ka time hua to uska bhi tabiyat kharab hone ka bahana shuru ho
gaya aur wo apna pet pakadkar baith gaya. Class aayi aur saath mein Rider bhi.
Lekin Rider use dekh kar chaunk gaya aur uske honthon par ek vijayi muskan
khil gayi
kyunki aaj Pawan akela tha. Usne Pawan ki aur dekhkar apne left haath par
mukka mara jo suchit karta tha ki beta Pawan bahut bach gaya aaj
to teri kahir nahin. Pawan ne bhi use dekha lekin dar aur ghabrahat
se kuch keh na saka. Uski to himmat bhi nahin ho rahi thi ki sar uthake Rider
ki taraf dekh sake. Bas apni seat par pet pakadkar sar jhukaye baitha raha.
Tabhi class
teacher ne class mein kadam rakha aur sab bachhon ne khade hokar
unka abhivadan kiya. Unhone bacchon ko baithaya aur attendance
lagani shuru kar di. Pawan ka roll no aane par unhone use do baar
awaaz lagayi lekin Pawan ka dhyaan unki taraf kahan tha. Uska poora
dhyaan to Rider ki taraf tha. Class teacher Pwan ke paas aaye aur
usse poocha ki tumhara dhyaan kahan hai to jaise wo neend se jaaga aur karahte huye bola ki Sir mujhe pet mein
bahut joron
se dard ho raha hai. Kal bhi kaafi dard tha isliye mein aa nahin paaya.
Aaj isliye aaya tha ki meri padhai jyada chutti karne se miss ho rahi thi to kuch school mein jaakar padh lun.
Uski baat sunkar teacher muskuraye aur kaha Pawan beta tum ek honhar ladke ho. Tumne bahut achha socha lekin tum ek baat batao ki tum agar poora rest nahin karoge aur rest ke bina school mein padhne aa jaoge to isse tabiyat aur jyada kharab ho jayegi. Phir tum aur jyada din school nahin aayoge to usse to padhai ka aur jyada nuksaan hoga na. Isse to achha hai ki tum ek do din aur rest kar lo aur jab poori tarah se theek ho jao tabhi school aana. Aur haan tumhari aaj ki attendance mein lagadi hai isliye tum chaho to aaj Recess mein ghar jaa sakte ho. Andha kya maange do aankhein wali kahawat aaj Pawan par charitrartha ho gayi thi. Jaisa jaisa usne socha tha ab tak sab kuch waisa hi ho raha tha. Usne poora man bana liya ki aaj school se recess hote hi ghar chala jayega aur jab tak Ravi nahin aa jata tab tak school nahin ayega.
Lekin
abhi to Recess chaar period door hai. Aur kya wo Rider se bach payega?
Teacher se to
permission mil gayi lekin chaar period katne kitne bhaari pad rahe
the ye to Pawan ka dil hi jaanta tha. Uska padhai mein bilkul man
nahin lag raha tha. Sab hairan the ki padhai par itna dhyaan dene wala ladka
aaj padhne ke mood mein hi nahin hai lekin sab ye sochkar chup ho gaye
ki uski tabeeyat shayad jyada hi kharab hai.
Pawan ko ye chaar period jaise
chaar saalon ki tarah lag rahe the. Reh reh kar wo
kabhi kitabon ki taraf to kabhi Rider ki taraf dekhta. Lekin jab bhi
Rider ko dekhta to use apne aapko ghurta hua pata.
Usne socha ki
kya aisa nahin ho sakta ki mandawali (Samjhota) ho jaye dono ke
beech. Lekin ye hoga kaise. kya Rider uski baat manega. Agar nahin maani to uska
kya haal karega. Sochte sochte chautha period bhi shuru ho gaya. Period class
ka shuru hua lekin tension apne Pawan ko ho gayi hone wali ghatna ke baare
mein sochte
sochte. Kash ye period kabhi khatam na ho. Bas waqt yahin tham jaye. Kaash
kahin se Ravi daudta hua aa jaye uske pass.
Lekin insaan jo
sochta hai agar wo sab hone lage to bhagwan ke naam se logon
ka vishwas hi uth jayega.
Dheere
Dheere chautha period bhi khatam ho gaya aur Pawan bijli ki teji ke
saath teacher ke bagal mein chalte chalte class se bahar aa gaya. Bahar
aate hi wo bhagte bhagte Main gate tak pahuncha lekin gate andar se band tha.
Usne yahan wahan najar daudayi to
use chaukidar najar aaya aur usse request karne laga ki wo
fauran gate khole taaki wo apne ghar
jaa sake.
Chaukidar ne usse uske jaane ka kaaran poocha to usne bata diya ki
uske pet mein dard hai aur class teacher ki hi permission se jaa raha hai.
Chaukidar ne kuch hairat se use dekha kyunki wo itni tezi se bhagkar
aaya tha aur shakal soorat se bhi kahin se wo bimaar nahin lag raha tha. Lekin use
kya usne socha saale aaj kal ke ladke padhai na karne ke bahane dhoondhte
rehte hain.
Ye bhi nahain sochte maa-baap khoon paseena ek karke inki fees ka intezam
karte hain, inhe achha khane, achha pehnanne ko dete hain, har tarah se inka itna
khyaal rakhte hain lekin in ladkon ko jara bhi samajh nahin hai. Inhein bas masti
karni hai chahe maa baap ke dil par kuch bhi kyun na gujre inki harkaton se.
Sochte sochte usne gate khol diya lekin tabhi ....
Jaise hi
chaukidar ne gate khola to Pawan ki seedhi nazar saamne se jaa rahe ek
maa-bete par padi. Ek chota sa bachha chuhalbaazi karta, masti
karta kabhi idhar jaa raha tha to kabhi udhar. Lekin uski maa use
baar baar aisa karne se rok rahi thi. Bachhe ko pata nahin tha ki
uske liye kya galat hai kya sahi lekin uski maa to har samay uski
raksha ke liye tatpar thi.
Bachha
school ke saamne lage stalls ko dekhkar jid macha raha tha
ki
"Mummy ye dilao, Mummy wo dilao" Lekin uski mummy ko pata tha ki bazaar
ki cheeze kitni nuksaandeh hoti hain. Sab samaan khula pada rehta hai. Usmein
makkhi machhar, bechne wale ke paseene ki boonde, raaste se udti huyi dhool
jaisi milawat aa jaati hai. Isliye wo baar baar mana kar rahi thi bachhe ko.
Lekin
bachha kahan maane wala tha. Jab usne dekha ki uski mummy use kuch
nahin dila rahi to usne jor jor se rona shuru kar diya. Uski
mummy ne use daanta to uska rona aur tej ho gaya. Ab maa ka dil to
bas maa ka dil hai. Usse dekha nahin gaya aur usne wo cheez na
chahte huye bhi bachhe ko dila di. Bachha wo cheez paakar itna
khus ho gaya ki jaise use koi khazana mil gaya ho.
Bachhe ke
chehre par khushi dekhkar maa ke honton par bhi muskurahat tair
gayi.
Pawan ko ye
dekhkar apna bachpan yaad aa gaya ki kaise uski mummy, jab wo
bahut chota tha, haath pakadkar use school lekar aati thi. Kaise roz uski
famaishyion ko poora karti thi. Nayi nayi cheeze khane ke tiffin mein dalti
thi. Wo uske saath khelti, use lori sunati, use ghumane le jaati, uske saath dher
saari baatein karti. Lekin ek accident mein usne us samay apne maa-baap ko kho
diya jab
wo theek se samajh bhi nahin paya tha ki aakhir maa kya hoti hai. Uski
ahmiyat hamari jindagi mein kya hai.
Ab jab use
samajh mein aaya ki kyun devta log bhi taraste hain is dharti par
janam lene ke liye, sirf maa ka pyaar paane ke liye wo nayi nayi leelayen
karte hain, to wo apne parents ko kho chuka tha.
Wo
bachha aur uski maa kab ke jaa chuke the lekin Pawan ab bhi apni
maa ki dhundhli yaadon mein khoya huya tha.
Tabhi
achanak Pawan ke kandhe par kisi ka haath pada aur jaise wo neend
se jaaga aur hakikat ki duniya mein wapas aa gaya. Usne peeche mud kar
dekha aur ..............
𝐆𝐞𝐞𝐭𝐚 𝐠𝐞𝐞𝐭 gт
31-Mar-2022 03:53 PM
यह भाग भी बहुत मजेदार था👌👌 बेचारा पवन, रवि के बिना क्या हालत है बेचारे की 😂😂 टीचर ने भी सही ही कहा 🤔 चपरासी का भी सोचना ठीक ही है। पवन के स्कूल में एंट्री से लेकर अभी छुट्टी तक का सफर बड़ा इंट्रेस्टिंग रहा। एक एक लाइन पढ़कर बड़ा मजा आया 😇 उसे उसका बचपन और माँ, याद आ जानी भी अच्छी ही बात है। यह पवन के कंधे पर किसका हाथ पड़ा 🤔 है कौन ये? अब क्या होगा, देखते है अगले भाग में।👍🏻
Reply
Kareem
13-Jan-2022 08:39 PM
Wah
Reply
Angela
07-Oct-2021 12:09 PM
Beautiful✨
Reply